మెటాలో మరోసారి భారీ లేఆఫ్స్.. అధికారికంగా ప్రకటించిన సంస్థ

సోషల్ మీడియా దిగ్గజం, ఫేస్‌బుక్ మాతృసంస్థ మెటా మరోసారి భారీ లేఆఫ్స్‌కు సిద్ధమైంది. మే 20న తమ ఉద్యోగుల్లో 10 శాతం మందిని, అంటే దాదాపు 8,000 మందిని తొలగించనున్నట్లు అధికారికంగా ప్రకటించింది. దీనితో పాటు, ప్రస్తుతం ఖాళీగా ఉన్న 6,000 పోస్టులను కూడా భర్తీ చేయబోమని స్పష్టం చేసింది.

ఈ మేరకు కంపెనీ చీఫ్ పీపుల్ ఆఫీసర్ జానెల్ గేల్ ఉద్యోగులకు ఒక మెమో పంపారు. వాస్తవానికి ఈ లేఆఫ్స్ ప్రణాళికకు సంబంధించిన వివరాలు మీడియాకు లీక్ కావడంతో, తాము ముందుగానే ఈ విషయాన్ని వెల్లడిస్తున్నట్లు ఆమె తెలిపారు. కంపెనీని మరింత సమర్థవంతంగా నడపడం, ఇతర పెట్టుబడులను భర్తీ చేసుకోవడం కోసమే ఈ కఠిన నిర్ణయం తీసుకుంటున్నట్లు వివరించారు.

తొలగింపునకు గురయ్యే ఉద్యోగులకు అండగా ఉంటామని, వారికి భారీ సెవరాన్స్ ప్యాకేజీ అందిస్తామని మెటా హామీ ఇచ్చింది. అమెరికాలోని ఉద్యోగులకు 16 వారాల బేసిక్ వేతనంతో పాటు, ప్రతి ఏడాది సర్వీస్‌కు రెండు వారాల చొప్పున అదనపు వేతనం, 18 నెలల పాటు ఆరోగ్య బీమా అందిస్తామని తెలిపింది. ఇతర దేశాల్లోని ఉద్యోగులకు కూడా అక్కడి నిబంధనల ప్రకారం ప్యాకేజీలు ఉంటాయని పేర్కొంది.

ఆర్టిఫిషియల్ ఇంటెలిజెన్స్ (AI) రంగంలో సీఈవో మార్క్ జుకర్‌బర్గ్ భారీగా పెట్టుబడులు పెడుతున్న తరుణంలో ఈ నిర్ణయం వెలువడింది. కంపెనీని ఏఐ టెక్నాలజీ చుట్టూ పునర్నిర్మించే ప్రయత్నాల్లో భాగంగానే ఈ లేఆఫ్స్ జరుగుతున్నాయని విశ్లేషకులు భావిస్తున్నారు. మే 20న ప్రభావిత ఉద్యోగులందరికీ వారి వర్క్, వ్యక్తిగత ఈమెయిళ్లకు సమాచారం అందుతుందని కంపెనీ స్పష్టం చేసింది.